ចិន៖ អង្គការសុខភាពពិភពលោក (WHO) នៅថ្ងៃទី១១ ខែមេសាម្សិលមិញនេះបានរាយការណ៍ថា ស្រ្តីម្នាក់ត្រូវបានស្លាប់ដោយសារតែវីរុសផ្តាសាយបក្សី H3N8 នៅក្នុងប្រទេសចិន ដែលជាការស្លាប់របស់មនុស្សដំបូងគេដោយសារជំងឺគ្រុនផ្តាសាយបក្សី។
វីរុស H3N8 ត្រូវបានគេដឹងថាបានចាប់ផ្តើមរាតត្បាតតាំងពីឆ្នាំ២០០២ បន្ទាប់ពីត្រូវបានគេរកឃើញដំបូងបង្អស់នៅក្នុងហ្វូងសត្វទឹកនៅអាមេរិកខាងជើង។ វីរុសប្រទេស H3N8 នេះក៏ត្រូវបានគេដឹងថាមានការឆ្លងទៅលើសត្វផ្សេងៗក្រៅពីបក្សីផងដែរ ដែលរួមមានដូចជាសត្វសេះ ឆ្កែ និងភេសមុទ្រជាដើម។ យ៉ាងណាមិញ វីរុសប្រភេទ H3N8 នេះមិនដែលត្រូវបានរកឃើញនៅលើមនុស្សឡើយ ពោលគឺករណីដែលបានរកឃើញលើមនុស្សបានកើតឡើងនៅក្នុងប្រទេសចិន កាលពីខែមេសា និងខែឧសភាកន្លងទៅ ប៉ុន្តែមិនបណ្តាលឱ្យមានអ្នកស្លាប់ឡើយ។
តាមប្រភពពី WHO បានឱ្យដឹងថា ស្រ្តីដែលបានស្លាប់ដោយសារវីរុសផ្តាសាយបក្សី H3N8 នោះមានវ័យ ៥៦ឆ្នាំ រស់នៅខេត្តគ័ងទុង (Guangdong) ភាគអាគ្នេយ៍ប្រទេសចិន។ ស្រ្តីខាងលើបានធ្លាក់ខ្លួនឈឺកាលពីថ្ងៃទី២២ ខែកុម្ភៈ ត្រូវបានគេបញ្ជូនទៅមន្ទីរពេទ្យដោយសារជំងឺរលាកសួតធ្ងន់ធ្ងរនៅថ្ងៃទី៣ មីនា ហើយបានស្លាប់នៅថ្ងៃទី១៦ មីនា។
ខណៈពេលដែលការប៉ះពាល់ទៅនឹងទីផ្សារសត្វរស់អាចបណ្តាលឱ្យមានការឆ្លងនេះ ប៉ុន្តែគេនៅមិនទាន់ច្បាស់ថាតើប្រភពពិតប្រាកដនៃការឆ្លងមេរោគនេះជាអ្វីនៅឡើយទេ ព្រមទាំងកំពុងរកមើលវិធីដែលមេរោគនេះទាក់ទងនឹងមេរោគផ្តាសាយបក្សី A (H3N8) ផ្សេងទៀតដែលកំពុងរកឃើញនៅក្នុងខ្លួនសត្វ។ WHO បានលើកឡើងដូច្នេះ ដោយអំពាវនាវឱ្យមានការស៊ើបអង្កេតបន្ថែមលើសត្វ និងមនុស្សបន្ថែមទៀត។ គួររំឮកថា ករណីជំងឺផ្ដាសាយបក្សីដែលកើតឡើងទៅលើមនុស្ស ជាធម្មតាជាលទ្ធផលបណ្តាលមកពីការប៉ះពាល់ដោយផ្ទាល់ ឬដោយប្រយោលទៅនឹងសត្វ បក្សីដែលមានផ្ទុកមេរោគនេះ ទាំងពេលនៅរស់ ឬងាប់ ឬបរិស្ថានកខ្វក់ដែលមានមេរោគនេះអាទិ៍៕
